वेचलेल्या विचार कणिका - भाग 21
( लॉक डाऊन च्या काळात व्हाट्सअँपची माहिती करून घेऊन त्यावर रोज वाचनात आलेले विचार पाठवायला सुरुवात केली. त्याचे हे संकलन. )
चाफा
कुडचाफा- उन्हाळ्यात बहरणारा,घराच्या कुंपणाशी लावतात
पांढरा चाफा- पांढरी शुभ्र फुले, एक वेगळाच गंध, देहभान विसरून समाधिस्थ झालेला तपस्वीच जणू
हिरवा चाफा- सुगंध जणू वेडे करतो. पण फूल शोधायला लागते.
सोनचाफा- सुगंधाबरोबरच सुंदरही, झाड मात्र ठिसूळ. फुले काढणे धोक्याचे!
शिवचाफा- कधीतरीच दिसणारा' तळहाताएवढे फूल, मधोमध पिवळट आसनावर चिमुकली शुभ्र पिंड तिच्यावर सहस्त्रफणीधर नागांनी सावली धरलेली विशेष म्हणजे ही फांद्यांच्या जोडाशी लागतात.
कवठी चाफा- टेबल टेनिस च्या चेंडूसारखे फूल, भरगच्च व रुपगंधाने समृद्ध फूल, फूलदाणीला शोभायमान करणारे.
भुईचाफा- फूलांचे घोस देखणे व सुगंधित देठ लांब जाड व त्यावर फूल.
(चाफा बोलेना- लेखिका विमला जोशी)
ही सुमनांजली आज ज्याची जयंती त्या गणेशाला वाहू या!
-------------------
भरभक्कम वाढ होऊन, तीनशे वर्षे जगल्यावर शेवटी कोरडा पर्णहीन व म्लान होणाऱ्या ओक वृक्षासारखे जीवन जगण्याने माणूस श्रेष्ठ ठरत नाही.
लिलीचे फूल ऐन मे महिन्यात सकाळी उमलते व संध्याकाळी मावळून जाते. पण त्याचे सौंदर्य कायम लक्षात राहते. अल्पायुषी असूनही त्याचे जीवन सार्थकी लागते.
खजुराचे झाड नुसतेच ऊंच वाढते. सावली कोणालाच मिळत नाही. फळ मिळते पण तेही खूप उंचावर असते.
व्यक्ती फक्त स्वत: मोठी झाली पण तिचा समाजाला काही च उपयोग झाला तर तिचा विकास स्पृहणीय कसा मानता येईल?
श्री गोळवलकर गुरुजी
------------------------------------
आदिशक्ती
महासती पार्वतीला आदिशक्ती म्हणून ओळखले जाते.
भगवान रामकृष्ण आदिशक्तीला जगन्माता संबोधत.
आदिशक्ती सौम्य व शांत मातृ रुपी आहे, तरीही अधर्म अत्याचार माजला असेल, तेथे ती हाती शस्त्र धारण करून त्याचा नि:पात करते.
परकीय आक्रमणाने येथला समाज हतबल झाला होता. तेंव्हा समर्थ रामदासांनी याच शक्तिला तळमळीने हाक दिली.
काली, दुर्गा, भवानी ही आदिशक्तीची उग्ररूपे आहेत तर लक्ष्मी, पार्वती, सरस्वती ही सौम्यरूपे आहेत.
विद्येचे उपासक आदिशक्तीला सरस्वतीच्या रूपात बुद्धी तेजस्वी व्हावी म्हणून प्रार्थना करतात.
सुजनांचा विकास करणारी, त्यांना अभय देणारी, दुर्जनांना शासन करणारी अशी ही शक्ती ज्या राष्टात नांदते ते राष्ट्र अतुल तेजस्वी होते. तेथे सर्व प्रकारची समृद्धी नांदते. ते समर्थ बनते.
अशा आदिशक्तीला वंदन!
-----------------------------
सात्त्विक प्रवृत्ती असणाऱ्या व्यक्तीचे काही गुण
अक्रोध, अहिंसा, क्षमाशील, धैर्य,अनसूयक- कोणाचा हेवा न करणारा, सदाचारी, शुद्ध, सर्वाबद्दल समता बाळगणारा, सत्यभाषी, साधुवृत्ती असणारा, चित्त शांत ठेवून कर्म करणारा, चांगली स्मृती असलेला, अक्रूपण, दक्ष, त्यागी, निरहंकारी, सौम्य स्वभावी, विनयी, श्रद्धावान, संतुष्ट, बुद्धिमान, सर्वां भूती दया बाळगणारा, परोपकारी
या यादीत आणखी अनेक गुण जोडता येतील. तसा प्रयत्न करायला हरकत नाही.
त्याचबरोबर या यादीतील कोणते गुण किती प्रमाणात आपल्याकडे आहेत त्याचा विचार करून बाकीचे अंगी बाणवण्याचा प्रयत्न करू या.
ही यादी संस्कृत दिनदर्शिकेत आहे.
